شخباركم
اليوم بكتبلكم يوميات
السبت و الاحد

نبدا بيوم السبت

ايمي=شغالتنا الفلبينيه
زين يات ايمي تدق باب الغرفه الساعه 6 الصبح حشرتني كسرت الباب
رحت فتحت لها قالت في دوام قلتلها هيه
و رجعت انام

صارت الساعه 6:30 دقيقه اسمع منبه تلفوني يرد و في احد يدق الباب
ولا اسمع صوت امي تقول فلانه قومي ن تتأخرين على الدوام
قلتلها زين و بندت المنبه
و رجعت اكمل نومي
وعاد هذي المره نوم عميييييق و قعدت احلم



شوي افز من نومي اويه الساعه كم اخذت تلفوني اتطالعه اوييه
الساعه 7:57 دقيقه و انا دوامي الساعه 8


بسرعه بسرعه تجهزت و طلعت و اعطيه ريس كامل

وصلت نص المسافه اتصلت لربيعتي اوني ابي انازعها ليش ما سألت عني
اتصلت لها اأاأاأو طلعت البنت بروحها نايمه
قلتلها اويه انتي بعدح نايمه قومي تعالي انا بعد متأخره ماوصلت


أنا اخذ الطريج في الأيام العاديه بنص ساعه و في هذا اليوم خذيته بربع ساعه
ولما وصلت شفت فاجعه ماشي باركنات لان السبت كل سكان البيانه موجودين
رحت وقفت سيارتي عدال بيت الناس

وصلتني مكالمه من الدوام
اول ما دخلت8:30 شفت المدير في الويه بس الحمدلله ماقال شي و ربيعتي وصلت 9:30
و بعدين طلبت ماي حار علشان اشرب شاي

و قعدت اشتغل

الساعه10 رحت المطبخ ما اشوف لكم صرصور و أصارخ و تم القضاء× عليه

الحمدلله بمساعدة الأوفس بوي بس بعدين شفت واحد ثاني


و بعدين حسيت اني يوعانه

طلبت بوفك عمان ويا داغوص
و ضاعت عني غطاته
مع اني ما كليتها
و لبست الدغوص غتره و عقال و كندوره إللي يبي رقمه يخبرني




و لما خلص الدوام رجعت البيت
حسيت انه فيني خموووول


رحت انام


و بعدين قعدنا نتعشى
اكلت سلطه مع جبن



و بعدين شفت الحلقه
ويا اخواني و رحت انام

بسم الله الرحمن الرحيم



الأحد الموافق 29-3-2009


اليوم تأدبت نشيت من النوم الساعه 6
علشان ما اتأخر عن الدوام

و انا اتجهز


وصلني مسج من ربيعتي
قالت انها ما بتداوم الحبيبه رايحه
العين تشوف الأمطار

يعني امطار الفجيره مو عايبتنها
المهم تريقت و طلعت بوقت لاني كنت ابي اتمشى على راحتي في هذا الجو الحلو
وصلت الدوام وقلت للأوفس بوي يفتح كل الستاير اللي في الدوام
علشان تنفتح نفسيتنا عدل على الشغل
و طلبت منه اييبلي ماي



و انا قاعده افتح الكمبيوتر


السستم خربان
يصلحونه و يخترب طول اليوم

و فجأه و انا مندمجه في الشغل
اشوف واحد يرش على معطر الجو
خخخخخخخخخخخخخخخخخخخخخخخخخخ
طلع الأوفس بوي اونه ينتقم مني لانه الصبح
يالي يكلمني و ريحته زقاير و رشيت على باكيت الزقاير ماله معطر الجو
انا قلت الحمد لله رحت بعيد عن المدير و زقايره
و ييت اشرب الماي مالي



فيه طعم معطر الجو





وع وع وع الطعم ماحلوو

راح يابلي لبن علشان اكل كورن فليكس و طرشته الدكان اييبلي بطاقه للتلفون و مكسرات دنق دونق
رحت المطبخ اييبلي ملعقه و لما كنت ابي اغسلها و فتحت الماي
تكهربت
ايدي عورتني




و محد سوالي سالفه محد صدقني
و قعدت اكل الكورن فليكس




و خلصت شغلي اليوم بوقت الحمدلله
و قعدت اتريا متى بتستوي الساعه 2

دخلت المنتدى كتبتلكم مذكرات يوم السبت و انا افح عين و اغمض عين
حتى ما اذكر شو كاتبه و في كلمات مو مفهومه خخخخخخخ
و نمت شوي
و بعدها جهزت نفسي و طلعت لان كان عندي اجتماع للأعضاء المؤسسين لفريق عدسات اماراتيه
و خلصنا الاجتماع الساعه 8
والحمدلله






و رجعت البيت تعشيت
والحين اكتب لكم يومياتي و اتطالع التلفزيون انا و اختي الصغيره


ان شاء الله ما اكون مللتكم بيومياتي



في أمان الله

السلام عليكم و رحمة الله و بركاته


اسموحه منكم لنقطاعي من فتره عن مذكرتي العزيزه

اليوم ما بكتب يومياتي لكن
بكتب شي فخاطري يخنقني
يمكن اريح بالي شوي


على هامش الحياة


كنت دوما انظر اليهم



...هؤلاء
من هم على هامش الحياه ...... ويرق قلبى لحالهم
هم اناس ليس لهم فى الحياه طريق
فتجنبوها..... واتخذوا من الهوامش طريق
اه... كم يعذبنى ان اراهم هكذا
انا امضى سريعا ... وهم يزحفون
انا احلم...وهم مستسلمون
انا ارى وهم .....تائهون
توقفت ...لانظر بجوارى
وجدت اخرين
اسرع منى
ابصر منى
تجاوزوا الاحلام
فوجدت .....
انى
ايضا
على هامش الحياه


أنا اللي للأسف عايش على هامش حياة الناس


حياة ما لها قيمة وأنا مجبور اجاريها


أنا من عاش بالدنيا طموحه رابطه بالياس


ولو بيدي حلول لحالتي ما احترت اسوّيها


أنا كتله من الهم ومن الحزن ومن الهوجاس


مشاعر شاعر ما تعترف بشعور راعيها


أنا حس فقد حسه ومعنى الحس والاحساس


معاني ما لها معنى وتبحث عن معانيها

السلام عليكم و رحمة الله و بركاته





يوميات 13- 14-كالعاده الصبح نتجهز للدوام








طبعا الساعه 7:30 اطلع من البيت

وصلت الدوام أيييييء لزمت بريك ((السفايف خربانه تبا تبديل )) خخخ


وقفت عند الباب دبل اشاير و بطلت الحزام و نزلت بصمت و رحت ادور باركنج
الحمد لله كان الخير وايد و الباركنات ترس المكان اليوم ولا يوم السبت نلف 66 لفه و ما نحصل

أول ما كنت بدخل شفت الاوفس بوي يفتحلي الباب ((شخصيه)) انزين
دخلت ما سلم علي؟؟!! قلتله ليش ما تسلم ما شفتني يعني
قلتله الهندي مال شركة التنظيف (( ما انصحكم فهم كل يوم شايفتلي صرصور يتمشى في الدوام يا على االمكاتب ولا الجدران)) يوم يشوفني قبل لا افتح حلجي يحليله يسبقني بالسلام مو الصرصول العامل الهندي

قال الاوفس بوي زيت انتي ما يشوف انا ليش انتي ما يسوي سلام
قلتله دامك فتحت الباب قول انت السلام عليكم

تاريخ 13-4 صارت عندنا مشكله في السستم بسبب مسؤولي في القسم
و يقول لا الغلط منج تصرفي
و قبلها بيومين نفس الحاله
المهم
نائبة المدير بعد ما نقعتني ساعتين اترياها تتصل المقر الرئيسي حق الـــ
IT
ديبارتمنت
حاولوا بالسستم من كمبيوتري بس ما قدروا يحلون المشكله
انا قلتلهم ما يستوي انا جربت كل الطرق و الإحتمالات إللياعرفها

بنت (( آي تي )) بس محد يصدقني
قعدت اتطالعهم و هم يرجعون يسوون كل الاشياء اللي جربتها
و بعد ما فشلت محاولاتهم و باءت بالفشل
استسلموا و رفعوا الرايه البيضا
قلتله تراه كان غيرك اشطر
صارت قبل و ما انحلت من هنا بس انت راسك يابس ..<<ماقلتها
قال طرشوا رساله حق الهيلب دسك
و بعدين صلحوه من عندهم
و مشت الأمور تمام
و الحمدلله خلصت الشغل الساعه 1:00
و قعدت فاضيه اتريا الساعه 2:00
علشان أروم البيت صارت الساعة 1:58
ياتني الفلبينيه
يايبتلي شغل
و الحبيبه مغلطه فيه

و انا دخلته في السستم قلت عادي مسؤولي طوفها و نائبه المدير تسوي طاف مرات للقوانين و تسوي واسطه و تحط قرارات على كيفها
و هي موقعه على الاوراق على الموافقه بعدين تبين انه غلط و انتبهت بس بعد شو توقع و هي مغمضه عينها (( على العميان))

و صارت المشكله المسؤول مالي ما يعرف يلغي العمليات من على السستم و انا اقول له غلط و هو يقول لا
انتي تسوي شي بالغلط من عندج و تصير المشكله عورلي راسي رحت عنه
و هو رجع المعامله في السستم غلط كالمعتاد و صارت السالفه
الحين الساعه 2:04 انا بندت الكمبيوتر و قلتلهم الصبح بنتصل المقر الرئيسي

بس الفلبينيه تبا تتفلسف ترا بسببها كاتبه المعلومات غلط و ميته من الخوف و الرعبه

الحمدلله المدير محد ولا بيخمس فينا

زين الفلبينيه فهمتا انه ما اقدر اسوي شي الا هي تبا تتفلسف قالت لالا انتي سوي جدامي انا بشوف
اقول لها ما يستوي
صدعت فيني
خليتها تخبص
(( وإللي ما يعرف للصقر....يطبخه...." احم احم اقصدي يشوييييه"))
راحت تتصل حق ربعها الفلبينيين في الفروع الثانيه تسألهم و ماشي مجال اصلا ما يستوي
قلتلها بابا ديانا هذا لازم نكلم الفرع الرئيسي يسونه من عندهم
و شو بقنع فوحده امها صينيه و ابوها فلبيني راسها يابس
انا عصبت و خليتهم و طلعت على كيفي من كثر ما عصبوا فيني
انتصلوا الهد اوفس يحلون المشكله و قالوا انه هذي غلطه مسؤول القسم


و هذي آخر مره بنسويلكم شي ولا تتصلو ا



ظهر الحق الحمدلله الحمدلله و مسؤول القسم قال لهم الحين (قمر الرومنسية) بتستانس
اول ما وصلت الصبح خبروني

قالوا يبون يطلبون ريوق قلتلهم انا مابا مابا مابا
بس هذيل غصب عنك بيخلونك تاكل

طلبولي عصير أناناس مع كيوي (( الخلطه العجيبه)) و فطيرة لبنه بالزعتر
وصل العصير و الاكل بعده ما وصل إلا بعد ساعه

ماخبرتكم نازعوني اليوم خ خ خ خ خ
طبعا المدير من اسبوعين ماخذ اجازه و نحن نقرا الجرايد بداله انا ماخذه الجريده من الصبح و الكل على بالهم الجريده ما وصلت
بعد الريوق قعدت اقراها و لما خلصت رجعتها لهم و سبوني سب الله يسامحهم غلا الجريده بدرهمين اوني عاد
رحت القسم الثاني حق ربيعتي لأني اب
اسألها عندي تصميم خاتم و ابي محل ذهب يسويه حقي
عندنا وحده فضوليه بشكل فضيع
حتى لو شافتنا نسولف بتقول عيدوا السالفه
هذي الله يسلمكم تبا تعرف انا شو قلت حق ربيعتي
حوالي الساعه
11:30
مريت من صوب مكتب الفضوليه قالتلي اون في ناس بيون يسون خاتم ذهب
تبا تغيضني قلتلها عادي عندي اذا عرفتي انا اهم شي عندي راحة بالي
انا كنت مرتاحه لكن انتي اللي متعبه تفكيرج
يالله على فضولج
و رحت مكتبي على الساعه 12:49
يات عندي قالت انها يوعانه
تبا تاكل أكله باكستانيه
لا انا اعرف اسمها ولا هي تعرف اسمها
انا اسميها سمبوسه غلاقانه
قالت هذي سمبوسه مرقيي = يعني سمبوسه ميته خخخخخ بالباكستاني

نوقد شموع حياتنا بالشموع بالآمال
هي الالوان
هي لوحة بيضاء او سوداء او رماديه
او ذات لون واحد
كئيبه هي لا حياة فيها لابسمه لا كيان
لايمكن ان ينظر لها الاخرون ..!!



حين ناخذ لوح الالوان والفرشاة
ونبدأ بتلوينها لا نتوقف عند لون واحد
لانتوقف الا حين نجد البسمة
على ثغرنا المبتسم




ما اجمل الراحة بعد عناء يوم متعب
ما اجمل ان تذهب الي النوم تريد ان تغفو
فوق سريرك
وبين طيات اغطيته
لكن ألن يكون رائع وجميلا لو
كان هكذا
مارأيك ؟!
اليس جميلا ان تنام بين بستان من الألوان بستان من الزهر
انت لاتنام فوق طيات الاغطيه
بل بين الازهار والورود وبسمات الطيور
ستنام مرتاح حين تجد الالوان حولك
تغني لك بروعتها ونداء طبيعتها
ستصحواوقد لونت يومك قبل شروقه




تسير بالطرقات
تكلم هذا تمازح هذا تساعد هذا
الست هنا تلون حياتك !!
ولا تكون لوحدك
فالناس بحياتك
ويلونون حياتك بطيبتهم
وعطائهم وتواصلك معهم
استمر في السير
حتى لو كنت مشلولا او معاقا


لون حياتك
تناول طعامك
واشرب شرابك
لكن!!
الن يكون رائعاً حين نجده
بلون تواجد الاخرين معك ؟!





رائعه هي الحياة بلون واحد




لكنها مجنونه حين تكون بالالوان

لاتتوقفي عند لون واحد
اجل جرح الآخرين هو اللون الموحد
لكن حين تمسكين شعلة الالوان
وتبدئي بتلوين اساءتهم
بروحك ستجدين لوحة رائعه من الالوان
وتنبهرين اياها تختارين



حين تجلس لوحدك
لاتتملك الكآبه
ولا تحزن ولا تغضب
لايوجد حبيب \ حبيبه في حياتك
انت \ انتي من يملك الحب
اجلس في غابة الالوان ولا تهتم
روعتها في ابداعها جمالها في صياغتها
ادمج الألوان ولا تهتم الى ان تجد لونك المفضل
بعد رحلة الألوان ستجد ان لونك المفضل
هو الألوان مجتمعه
والطبيعه والألوان
التي حركت مشاعر الشعراء
وصاغت على السنتهم
اجمل الكلام وأرق المعاني




حياتنا
كالـــفــصول
فصول السنه
المتقلبه
الممطرة الحارة
المشمسه المغبرة
يأتي صيف ويرحل
يأتي الشتاء ويبرد
ثم
يأتي الخريف
ونرى تساقط اوراقنا

لكن ما اجمل فصل في السنه
الربيع يأتي لنا بالزهور
بالألوان اليس رائعا
ان نحول حياتنا
الى فصل الربيع




الماء
نعرفه لا طعم ولا رائحه
اليس جميلا ان يكون ملونا ً
اعكس تعاملك مع الآخرين
تصبح حياتك وحياتهم ذات ألوان
لون الماء ببستمك
بنظرتك للحياة

لون المطر حين يتساقط
لون واحد
لكن
بعد شروق الشمس
نرى قوس قزح
ملأ الكون بروعته
احيانا يحمل لنا المطر الكآبه
والحزن اذا كان مطر عذاب
لكن بعده
يأتي لنا الفرح
انه قوس قزح
كن مثله
ولا تكن مثل مطر العذاب




تخيل لو ان حياتك كانت خالية دون الوان ؟!تخيل انك صنف واحد لكل الوان الرجال ..!!

و ان كل الفتيات صنف واحد لفتاة واحدة ..!!

بنفس الاذواق في فساتينها و عقد صدرها و ربطة شعرها ..

ماذا لو كنا نعيش وسط الرماديات فقط و بياضها ..؟!

و لنفترض اننا كنا مصابين بعمى الالوان لا نرى سوى عتمة سوداء ..!!

كيف ستشعر بجمالية رقصك مع فستان الربيع ..؟!
او جمالية
جنونك تحت شفافية المطر ..؟!




هنا فقط

علــ ألوان ــبة يكون هناك متسع ٌ لـ علــ ألوان ــبة



انا احاول الون حياتي و اتمنى الكل تكون حياته
ممزوجة بالالوان الزاهيه

((( صباح الخير )))
¸.•°``°•.¸ ¸.•°``°•.¸ ¸.•°``°•.¸
♥ غفر الله لك ولوالديك وأهلك وادخلكم الجنة♥ آمين
`°•.¸¸.•°` `°•.¸¸.•°` `°•.¸¸.•°`
جمعة طيبه عليكم



[size=16]آآآآآآآ كأني اسمع صوت يهال برع[/size]
الله يستر اذا عيال خالي (مفترسين و تعلوا جباههم الوحشيه) بسير اتطالع
بعلن حاله طواري في البيت
هذيل مافيهم حنيه على الحيوانات
من زمان عذبوا حيواناتي
و سبحوهم بالعصير

والله ما اعرف
كيف الحريم يصيروان امهات و لا فيهم صفات الأمومه
كل يوم فارتنهم فبيت حد
ترفعلي ضغطي امهم
تربيتهم تربيه الشغالات ولا تسال عنهم
و اللي قاهرني انه ولدها الصغير عمره حوالي خمس شهور
تخليه عند اخته غللي عمرها سنه
وااااااااي يعني هذيل أطفال ما يفهمون يمكن تسويله شي
المهم الحين انا بسوي حاله استنفار في البيت
البارحه يابتهم و اليوم بعد يابتهم
الواحد مايرتاح من الصدعه لا في البيت ولا في الدوام



الحمد لله طلعوا عيال خالي الثاني هذيل أليفين
و قلوبهم رحيمه على الحيوانات

ربي لا يغير عليهم

بخليكم الحين و لي عوده بعدين